تحدي ال29 يوم - اليوم العاشر

مرحبا وياكم مصطفى للمرة الثانية بهاي الرحلة الممتعة

 مثل ما عرفنة بالبلوك السابق انه ناوي اتعلم برمجة تطبيقات الاندرويد خلال 29 يوم بأستخدام جافا الهدف جان هو صناعة تطبيق في  نهاية هاي ال29 يوم بي نوع من التعقيد لكن الخطة صارت انه اصنع عدة تطبيقات متنوعة وصغيرة 

لحد الان كدرت اكمل 3 تطبيقات وهي 

تطبيق مفردات للأنكليزية 

تطبيق آلة حاسبة

تطبيق اختبار للغة الانكليزية

استخدمت العديد من الدورات بهالرحلة ومنها مبادرة المليون مبرمج وكورس برمجة تطبيقات الاندرويد للدكتور حسين الربيعي وغيرها مقاطع متنوعة حسب الشي الي احتاج اعرف عنه, كمية الجهد الي انبذلت لصناعة هاي التطبيقات البسيطة كان اكثر من العادة بسبب المشاكل التقنية الى واجهتني وانقطاع الكهرباء وغيرها لكن الحمدلله يعتبر التقدم مرضي جدا خاصة على الصعيد المعرفي بالبرمجة  والمفاهيم البرمجية الجديدة الي اكتسبتها خلال هاي الرحلة

 تعلمت هواي شغلات منها شلون اتعامل البيانات وتنظيمها شلون اتعامل وية المدخلات والمخرجات بشكل منظم اكثر من السابق

 لحد الأن اني مستمتع جدا بهذا التحدي والي خله هذا التحدي ممتع اكثر واكثر هو التواصل وية باقي المشاركين بعيدا عن التحدي جان اكو تبادل فكري وثقافي رهيب بكل حوار بين المشاركين بالتحدي

الخطة بالبداية جانت اتعلم وبعدها اكمل تطبيق بس نوع من التعقيد 

لكن شفت من الافضل ان اسوي عدة تطبيقات بسيطة متنوعة وهالشي راح يخليني اتعامل ويه اجزاء مختلفة من اللغة مثل الدوال  الرياضية الدوال النصية وغيرها حسب التطبيق الى داسوي هالطريقة اكثر عملية واكثر ملائمة وراح استمر عليها ان شاء الله 

لحد الان ممفكر بأي تغيير للخطة لان كاعدة تمشي بأحسن صورة صح واجهتني شوية مشاكل وعراقيل بتوافق اصدارات بعض المكاتب البرمجية وغيرها من المشاكل التقنية لكن مع كل هذا الخطة فعالة بمعدل تطبيق كل 3 ايام تقريبا يعني تقريبا 9 تطبيقات في نهاية التحدي وهذا الشي غير ثابت ممكن اكثر ممكن اقل حسب الامكانية والظروف المتوافرة وان شاء الله راح احقق الهدف وهو انه اتطور قدر الامكان بلغة الجافا 

اتمنى اكدر احافظ على نفس المستوى واكمل على الي دا اسوي بال10 ايام الجاية

ممتن جدا لـ

 التبادل الفكري والثقافي في كل حوار مع المشاركين في التحدي -

   التعاون والايجابية الي يبثها فريق التحدي بين المشاركين-